Topographia Bavariae/060
| GenWiki - Digitale Bibliothek | |
|---|---|
| Topographia Bavariae | |
| Inhalt | |
| A B C D E F G H I J K L M N O P Q R S T U V W X Y Z | |
| <<<Vorherige Seite [059] |
Nächste Seite>>> [061] |
 | |
| Hilfe zur Nutzung von DjVu-Dateien | |
| Texterfassung: korrigiert | |
| Dieser Text wurde anhand der angegebenen Quelle einmal korrekturgelesen. Bevor dieser Text als fertig markiert werden kann, ist jedoch noch ein weiterer Korrekturdurchgang nötig.
| |
Vnderhalb dieser Statt/ ligt der Fleck Kunken/ nicht weit von der Thonaw/ vnd gegen Hoffkirchen über/ d'bey dē Antonino Quintiana Castra, vnd/ in der Notitia Imperii, Quintana, genent wird: daselbst der Priester S. Silvinus, vmbs Jahr 460. ohngefehr/ gelebt hat; dessen Eugippius, in vita S. Severini, gedencket.
Oetting.
DIeses ist auch ein Bayrische/ aber in OberBäyern gelegene/ vnd in die Fürstliche Regierung Burckhausen gehörige Statt; Hat ein LandGericht/ in welchem seyn der Marckt Tißling[1]/ ein Closter/ 2. Schlösser/ 7. Adeliche Sitz/ 8. Hoffmarchen/ sampt den Dörffern/ vnd andern Gütern. Es ligt diese Statt/ so zum Vnterschied deß Oettingen im Rieß/ Bäyrisch Oettingen [2]genant wird/ an dem Schiffreichen schnellen Wasser dem Jnn/ 8. Meylen von Saltzburg. Theyls vermeynen habe vor Zeiten Pons Æni geheissen; aber Cluverius hält alten Hohenaw (daselbst ein Jungfraw Closter/ Dominicaner Ordens/ von Graf Conraden/ von Wasserburg gestifftet/ darfür. Jn tomo 3. Metrop. Salisburgens. stehet am 59. Blat/ daß Vto, oder Oto, Hertzog in Bäyern/ ein Sohn Theodonis II. so sonsten der Grosse genennet wird/ seinen Sitz/ Hoffhaltung/ vnd Gerichtstul allhie angeordnet/ vnd den Orth nach ihme Oetingen/ oder Huodingen/ zu nennen befohlen habe. Siehe aber von dem Vrsprung deß Namens/ was Marcus Velserus libro 3. rerum Boicarum pagin. 186. wieder andere/ schreibet. Wegen deß guten Lagers/ Vogelfangs/ Jagten/ Fischereyen/ haben die Könige vnd Fürsten in Bäyern gar viel sich allhie auffgehalten; seyn auch allda/ wegen der Hunnen vnnd Vngarn stätigen Vberfalls deß Norici, die Fürstè deß Reichs offtmals zusammen kommen. Vnd wird in Mitten der Kirchen S. Philippi vnd Jacobi/ die Begräbnus der König vnnd Fürsten/ gewiesen. (S. Rupertus hat obgedachtè Diethen deß grossen Sohn Othen/ Hertzogen in Bäyern/ allhie getaufft/ vnd die Kirchen/ so er/ der Fürst/ bei seinem Pallast erbawet/ Christo vnd seiner werthen Mutter/ geweyet/ so zu der alten Capell genandt wird. Vnd stehet in tomo 2. Metropol. folio. 403. daß Hertzog Maximilian in Bäyern An. 1606. den Jesuitern jhr Residentz vnd Wohnung/ so sie Anno 1591. bey der vralten vnser Lieben Frawen Caoellen/ zu alten Oettingen angestellt/ bestättigt/ vnd für eygenthumblich vbergeben/ vnnd aller Beschwärnuß befreyet habe. Theils schreiben den Baw vnser L. FrawenKirche dem Käyser Carolo Magno zu. Die Vngarn haben folgends alt Oettingen verbrandt/ biß auff die besagte alte Capell/ zu welcher viel Walfahrten geschehen. Vnd ist die Vorstatt hernach zur Statt worden/ so jetzt New Oettingen an dem Jn/ wie gesagt/ gelegē/ zum Vnterschied deß gedachten Alt Oettingen/ so bey einer viertel Meil weiter davon ligt/ genandt wird/ so An. 907. geschehen seyn solle. Vorhero vmbs Jahr 876. hat Carolomannus, König in Bäyern vnnd Jtalien/ ein Sohn König Ludwigs in Bäyern vnd Francken/ vnnd Käyser Ludwigs deß Ersten Enckel/ so viel allhie gewohnt/ auch da am Schlag Annno 880. gestorben/ vnd begraben worden/ ein ansehenlich Benedictiner Closter erbawet/ vnd solches mit stattlichen Einkommen/ in Teutschland/ vnd Jtalia begabet/ auch vieler Heiligen Gebein/ vnd Reliquien, als S. Maximiliani, der Heil Felicitatis, sampt dem Arm deß Heil.Philippi, dahin gebracht. An. 1228. hat Hertzog Ludwig in Bäyern/ Pfaltzgraff/ allda ein Weltlich Stifft darfür/ von zwölff ChorHerren/sampt einem Dechant/ vnd einem Probst/ angerichtet/ deren Pröbste der erste war Fridericus Striphius vmbs Jahr 1231. der 15. in der Ordnung/ Johannes Mayer/ hat den ersten Stein der jetzigē Collegiat- oder Stifftskirchen zu S. Philippo vnd Jacobo, in dem Flecken Alt Oettingen/ nicht weit vom Jn/ vnd wie oben gesagt/ von der Statt New Oettingen/ gelegen/ gelegt/ so Anno 1508. gestorben. Der 21. Probst allhie war Martinus Eysengrein/ der Heyligen Schrifft Doctor/ welcher von den Antiquitäten vnnd Monumenten zu Oettingen ein Büchlein/ in Teutscher Sprach/ An. 1571. in den Truck hat kommen lassen. Jst Saltzburgisch. Dioecesis. Käys.Arnolph hat einsmals die Vngarn an diesem Ort geschlagen.